ആനച്ചന്തം

തെച്ചിക്കോട്ടുകാവ് രാമചന്ദ്രന്‍ നീരുകാലത്ത്

2010-11-26T23:25:00.001+05:30

തലയെടുപ്പിന്റെ തമ്പുരാന്‍ തെച്ചിക്കോട്ടുകാവ് രാമചന്ദ്രന്‍ നീരുകാലത്ത്. മദക്കോളില്‍ ആരെയോ ഓടിക്കാന്‍ ഒരുങ്ങുന്ന അവന്റെ “ആന”യായ തെച്ചിക്കോട്ടുകാവ് ദേവീ ദാസന്‍.

മുതുമലയിലെ ആനത്താവളത്തില്‍ നിന്ന്

2010-09-28T19:45:00.000+05:30

കാട്ടാന വന്നാല്‍ .....

2010-09-28T18:44:00.002+05:30

ചളിയിൽ തളർന്നു വീണു ചരിഞ്ഞ കാട്ടു കൊമ്പൻ

2010-08-01T15:24:00.003+05:30

വയനാട് ജില്ലയിലെ ബത്തേരിക്ക് സമീപം തമിഴ്നാട് അതിർത്തിയിലുള്ള ചെറിയ ഒരു ഗ്രാമമായ ചെട്യാലത്തൂരിൽ വയലിലെ ചെളിയിൽ തളർന്നു വീണ കാട്ടുകൊമ്പൻ. രക്ഷപ്പെടുത്തുവാൻ വനം വകുപ്പിലെ ഉദ്യോഗസ്ഥരും ഡോക്ടർമാരും നാട്ടുകാരും കിണഞ്ഞു ശ്രമിച്ചെങ്കിലും കൊമ്പൻ ചെരിഞ്ഞു. ഫോട്ടോ എടുത്ത് അയച്ചുതന്നത് ബത്തെരി സ്വദേശി സാജൻ.

ഗുരുവായൂര്‍ ആനക്കോട്ടയിലെ രാമചന്ദ്രന്‍

2010-07-15T01:02:00.003+05:30

ഇരിക്കസ്ഥാനത്തിന്റെ ഉയരം കൊണ്ട് കണ്ടമ്പുള്ളി ബാലനാരായണന്‍, ചുള്ളിപ്പറമ്പില്‍ സൂര്യന്‍ തുടങ്ങിയ മണ്‍ മറഞ്ഞ ഗജരാജന്മാര്‍ക്കൊപ്പം നിന്നിരുന്ന ഗുരുവായൂര്‍ ആനക്കോട്ടയിലെ രാമചന്ദ്രന്‍ എന്ന ആന.
ഏതാനും മാസങ്ങള്‍ക്ക് മുന്‍പ് ഇവനും ചരിഞ്ഞു. ഏറെ പ്രായമായെങ്കിലും ഇവനു നല്ല പരിചരണം ആയിരുന്നു ആനപാപ്പാനും ദേവസ്വവും നല്‍കിയിരുന്നത്. ഒരു ഗൂരുവായൂര്‍ കോട്ടയിലെ സന്ദര്‍ശനത്തിനിടയില്‍
ഇവനെ പരിചയപ്പെടുത്തിയത് ആനപ്രേമിയായ കരിപ്പ രതീഷായിരുന്നു.

ഓർമ്മയുണ്ടോ ഈ മുഖം?

2009-12-01T12:21:00.003+05:30

...ഇന്നോട്‌ കളിക്കാൻ നിക്കണ്ടാട്ടാ നല്ല കുത്തുവച്ചുതരും ഞാൻ പറഞ്ഞേക്കാം.....കുട്ടിക്കുറുമ്പൻ ലക്ഷ്മീനാരായണൻ.

മുകുന്ദൻ.....

2009-12-01T12:20:00.000+05:30

കീഴടക്കുവാൻ ശ്രമിച്ച് പരാജയപ്പെട്ട പലർക്കും ഇവൻ ഒരു നിഷേധിയാകാം എന്നാൽ കെട്ടും തറിയിൽ വേദനയുമായി നിൽക്കുന്ന ഇവൻ എന്നും ആനപ്രേമികളുടെ മനസ്സിൽ ഒരു നീറ്റലാണ്...

അഴകിന്റെ മറ്റൊരു അവതാരം... ഇന്ദ്രസെൻ.

2009-12-01T12:09:00.007+05:30

ഇന്ദ്രസെൻ.
ആനയഴകിന്റെ ഏതളവുകോലുവച്ചളന്നാലും മുൻ പന്തിയിൽ തലയെടുപ്പോടെ നിൽക്കും ഇവൻ. അതെ അഴകിന്റെ മറ്റൊരു അവതാരം...

ഇത്തവണ തെച്ചിക്കോട്ടിനു ഒരു ലക്ഷം കടക്കും ഏക്കം...കർണ്ണനും മോശമില്ലത്ത ഏക്കം ഉണ്ടാകും....

ഉം..നീയ്യാ പുത്തംകുളം അനന്ദപത്മനാഭനെ കണ്ടോ ഹോ എന്താ വലുപ്പമിഷ്ടാ... കഴിഞ്ഞതവണ ഉത്രാളീൽ അവനല്ലേ ഷൈൻ ചെയ്തേ...

അപ്പോ ഇമ്മടെ കാളിദാസനോ?

ഏത്‌?

ഇമ്മടെ അന്നകരയുള്ള ചിറക്കൽ കാളിദാസൻ ഒരു ഒന്നൊന്നര ആനയല്ലേ? വിഷ്ണൂന്റെ ഒപ്പം നിൽക്കും....

ഉവ്വ വിഷ്ണു ഒരു പിടുത്തം പിടിച്ചാ പാർത്ഥൻ വരെ മാറിനിൽക്കും...

ഉം...പാർത്ഥനും വിഷ്ണും ഒപ്പത്തിനൊപ്പാ...അത്‌ കാണണമെങ്കിൽ നീ പൊക്കുളങ്ങര വാ അപ്പോ കാണാ..

ഞാനിന്നാള്‌ ഗുരുവായൂർ പോയപ്പോ ഇന്ദ്രസെന്നെ കണ്ടു...എന്താ ഭംഗീന്നറിയോ? അതുനേരാ...എന്നാലും എനിക്കിഷ്ടം വലിയകേശവനേയാ....

അപ്പോ പാമ്പാടിരാജനോ?

അതിപ്പോ കുട്ടങ്കുളങ്ങര അർജ്ജുനൻ മോശാ?

ഒന്നുപോ ഗട്യേ....മഠത്തിൽ വരവിനു ചമയം കെട്ടി തിരുവമ്പാടി ശിവസുന്ദറ്‌ വന്നാലുണ്ടല്ലോ...ങാ അത്‌ ഒന്ന് വേറെതന്ന്യാ...

അതെ ആനപ്രേമികൾ അവരുടെ ഇഷ്ടതാരങ്ങളെ കുറിച്ച്‌ ചർച്ചകൾ തുടങ്ങിക്കഴിഞ്ഞു.... കണ്ടാലും പറഞാലും തീരാത്ത ആനക്കഥകളും കാര്യങ്ങളുമായി കാഴ്ചക്കാരുടെ മുന്നിലേക്ക്‌ മറ്റൊരു ഉത്സവകാലം കൂടെ വരുന്നു.സ്വർണ്ണത്തിളക്കമുള്ള നെറ്റിപ്പട്ടവൂംകോലവും ഏന്തി വർണ്ണക്കുടകൾ ചൂടി തലയെടുപ്പിന്റെ തമ്പുരാക്കന്മാരും അഴകിന്റെ ആനചന്തങ്ങളും അണിനിരക്കുന്ന മനോഹരമായ ആ ഉത്സവകാലത്തിനു മുമ്പ്‌ ആനപ്രേമികൾക്കായി പ്രത്യേകിച്ച്‌ പ്രവാസലോകത്തെ ആനപ്രേമികൾക്കായി ഏതാനും ചിത്രങ്ങൾ....

ഗജശ്രേഷ്ഠന്റെ നവഭാവം!!!

2009-03-28T00:04:00.002+05:30

നമ്മുടെ ഗിരീശൻ അഭിനയവഴിയിൽ!!!

തെച്ചിക്കോട്ടുകാവിനോടും ഒരു കൈനോക്കുന്നു...

2009-02-07T11:22:00.003+05:30

സക്ഷാൽ തെച്ചിക്കോട്ടുകാവിനോടും ഒരു കൈ നോക്കിക്കളയാം....വിഷ്ണുശങ്കർ തെച്ചിക്കോട്ടുകാവുമായി ഒരു മൽസരം !!!

തിടമ്പുമായി തലയെടുപ്പിന്റെ തമ്പുരാൻ തെച്ചിക്കൊട്ടുകാവ്‌ രാമചന്ദ്രൻ.

ചിത്രങ്ങൾക്ക്‌ കടപ്പാട്‌ മിസ്റ്റർ:വിലാഷ്‌ & മിസിസ്സ്‌.വിനി.എസ്‌.കുമാർ

ചുള്ളിപ്പറമ്പിൽ വിഷ്ണുശങ്കർ

2009-02-07T11:19:00.002+05:30

ചുള്ളിപ്പറമ്പിൽ വിഷ്ണുശങ്കർ എന്ന പേരുകേട്ടാൽ ആനകമ്പക്കാരായ യുവജനങ്ങൾക്ക് ആവേശമാണ്.മത്സരപ്പൂരങ്ങളിൽ പ്രധാന ആകർഷണങ്ങളിൽ ഒന്നാണിവൻ. ചെർപ്ലശ്ശേരിപാർഥനും,വിഷ്ണുവും മത്സരത്തിനായി അണിനിരക്കുമ്പോൾ കാണികൾക്ക് അത് ഹരമേകുന്ന കാശ്ചയാണ്. ഒറ്റനിലവാണിവനു. വളർന്നുവരുന്ന ആനകളിൽ മുൻ നിരയിലാ‍ാണ് വിഷ്ണുശങ്കർ. നാളെയുടെ വാഗ്ദാനമായ ഇവൻ തൃശ്ശൂർ ജില്ലയിലെ ഏങ്ങണ്ടിയൂർ-ഏത്തായിൽ ചുള്ളിപ്പറമ്പിൽ ശശിയുടെ സംരക്ഷണയിൽ ആണ്.

പുത്തംകുളം അനന്ദപദ്മ്നാഭന്‍

2008-12-25T11:50:00.006+05:30

അഴകും നിലവും ഒത്തുചേർന്ന ഇവൻ ഇത്തവണ തൃശ്ശൂർ ഭാഗത്തെ ഉത്സവങ്ങളിൽ പങ്കാളിത്തം ആരംഭിച്ചിരിക്കുന്നു.തൃശ്ശൂർ ജില്ലയിലെ പടിഞ്ഞാറൻ ഭാഗത്തെ പ്രമുഖ മത്സരപ്പൂരങ്ങളായ പൊക്കുളങ്ങര ,ആയിരം കണ്ണി(മാർച്ച് 3-4-2009) ഉത്സവങ്ങളിൽ ഇവൻ മിക്കവാറും ചുള്ളിപ്പറമ്പിൽ വിഷ്ണുശങ്കർ,ചെർപ്ലശ്ശേരി പാർഥൻ തുടങ്ങിയ യുവകേസരികളുമായി മാറ്റുരക്കും.തീപാറുന്ന ഒരു മത്സരം ആനപ്രേമികൾക്ക് ഇവിടെ കാണാൻ കഴിയും എന്ന് പ്രതീക്ഷിക്കാം.തിടമ്പേറ്റുന്നത് ഉത്സവപ്പറമ്പുകളിലെ മെഗാസ്റ്റാറും തലയെടുപ്പിന്റെ തമ്പുരാനുമായ തെച്ചിക്കോട്ടുകാവ് രാ‍മചന്ദ്രൻ തന്നെ അയിരിക്കും എന്നതിൽ തർക്കം ഇല്ല.

കുട്ടൻകുളങ്ങര രാമദാസ്‌

2008-03-13T17:31:00.001+05:30

ഗജലക്ഷണശാസ്ത്രപ്രകാരം അഗ്രഗണ്യൻ എന്ന വിശേഷണത്തിന്‌ യോജിച്ച മാതംഗരാജൻ!!!
സഹ്യപുത്രനായ ഇവൻ തൃശൂർ കുട്ടൻകുളങ്ങരക്കാരൻ
തൊടുപുഴ ഗജമേള 2000 ത്തിൽ ഗജരാജപട്ടം നേടിയവൻ!

മംഗലാംകുന്ന്‌ കർണ്ണൻ

2008-03-06T19:53:00.001+05:30

തൃപ്പൂണിത്തുറ ശ്രീ പൂർണത്രയീശ ക്ഷേത്രത്തിൽ

മുണ്ടയ്ക്കൽ ദേവനാരായണൻ

2008-03-04T19:48:00.003+05:30

തൃപ്പൂണിത്തുറ താമരംകുളങ്ങര ശ്രീ ധർമ്മശാസ്താ ക്ഷേത്രത്തിൽ

മുല്ലക്കൽ ബാലകൃഷ്ണൻ

2008-02-25T21:22:00.000+05:30

മുല്ലക്കൽ ബാലകൃഷ്ണൻ തൃപ്പൂണിത്തുറ താമരംകുളങ്ങര ശ്രീ ധർമ്മശാസ്താ ക്ഷേത്രത്തിൽ

അമ്പത്താറാം വയസ്സിലും ..

2008-02-20T15:50:00.002+05:30

ഇരുപത്തഞ്ചും മുപ്പതും വയസ്സുള്ള ചുള്ളന്മാരെയൊക്കെ പിന്നിലാക്കി ഗുരുവായൂര്‍ ആനയോട്ടത്തില്‍ രാമന്‍ കുട്ടി മുന്നില്‍.

ശ്രീ ഗുരുവായുരപ്പന്റെ സ്വന്തം പദ്‌മനാഭൻ!!!

2008-02-12T21:53:00.000+05:30

പുന്നത്തൂർ കോട്ടയിൽ നിന്നും പകർത്തിയത്‌

രണ്ട് ആനകള്‍

2007-11-11T13:35:00.001+05:30

പേരറിയില്ല. ക്ഷമ.

തെച്ചിക്കോട്ടുകാവ് രാമചന്ദ്രന്‍

2007-11-11T13:31:00.001+05:30

തെച്ചിക്കോട്ടുകാവ് രാമചന്ദ്രന്‍

ഗജരത്നം ഗുരുവായൂര്‍ പത്മനാഭന്‍

2007-11-11T13:23:00.001+05:30

ഗജരത്നം ഗുരുവായൂര്‍ പത്മനാഭന്‍

കാറിന് പിറകെ .......

2007-11-10T18:06:00.000+05:30

മുതുമലയിലെ മൈസൂര്‍ റോഡില്‍ ഞങ്ങളുടെ കാറിന് പിറകെ വരാനൊരുങ്ങുന്ന ആന.

ഗുരുവായൂര്‍ പദ്മനാഭന്‍.. ഇനി ഉത്സവ ലഹരിയിലേക്ക്...

2007-09-12T19:17:00.000+05:30

ഗുരുവായൂര്‍ പത്മനാഭനിതു സുഖ ചികിത്സാ‍ക്കാലം.

നാലരമാസത്തെ നീരിനു ശേഷം പദ്മനാഭനെ കഴിഞ്ഞ ദിവസം അഴിച്ചു കെട്ടി. ഇപ്പോള്‍ സുഖ ചികിത്സയും ചില ചട്ടപരിശ്ശീലനങ്ങളുമാണ്.
ശേഷം..
പൂരങ്ങളുടേയും ഉത്സവങ്ങളുടെയും ആരവങ്ങളിലേക്ക്

സാധാരണ കെട്ടി അഴിക്കലിലുണ്ടാകാറുള്ള മര്‍ദ്ദങ്ങളൊന്നും പത്മനാഭന് വേണ്ട. നീരിനു ശേഷം നല്ല അനുസരണയുള്ള കുട്ടിയായി അവന്‍ ആനക്കൊട്ടയില്‍ മുന്നില്‍ തന്നെ ഉണ്ട്. തൊട്ടടുത്ത് നിറുത്തിയിരിക്കുന്ന മുകുന്ദന്‍ എന്ന കൊലകൊല്ലിയുടെ വികൃതികളൊന്നും പത്മനാഭനെ അലട്റ്റുന്നില്ല. മുകുന്ദന്‍ പരമാവധി പ്രകോപിപ്പിക്കാനായി പനമ്പട്ട എടുത്ത് പത്മനാഭനെ എറിയുന്നുണ്ട്. ഒരിക്കല്‍ പോലും പത്മനാഭന്‍ പ്രകോപിതനായി കണ്ടില്ല.

ഇന്ന് എന്റെ മൊബൈല്‍ കാമറയില്‍ പകര്‍ത്തിയത്. പാപ്പാനും കവിയും സുഹ്രുത്തുമായ കൃഷ്ണന്‍ കുട്ടിച്ചേട്ടനുമായുള്ള സൌഹ്രദം പുതുക്കാന്‍ ആനക്കൊട്ടയില്‍ കയറിയപ്പോള്‍ എടുത്ത പടങ്ങള്‍.

മുതുമല, തമിഴ് നാട്.

2007-07-21T22:37:00.000+05:30

മുതുമല, തമിഴ് നാട്.

ഗുരുവായൂര്‍ പത്മനാഭന്‍ തത്തമംഗലത്ത്

2007-07-15T19:02:00.000+05:30

ഗുരുവായൂര്‍ പത്മനാഭന്‍ തത്തമംഗലത്ത്

ഗുരുവായൂര്‍ പത്മനാഭന്‍

2007-07-13T23:39:00.000+05:30

ഗുരുവായൂര്‍ പത്മനാഭന്‍ - നെമ്മാറ വേല 2007 നു എടുത്ത പടം

മുതുമലയിലെ കാട്ടാനക്കൂട്ടം.

2007-07-11T22:04:00.000+05:30

മുതുമലയിലെ ഉള്‍ക്കാടുകളില്‍ നിന്നുള്ള ദൃശ്യം

ചേറ്റുവ ചന്ദനക്കുടം നേര്‍ച്ചയ്ക്കിടെ ആന ഇടഞ്ഞപ്പോള്‍

2007-04-22T09:27:00.000+05:30

വാടാനപ്പള്ളി (09/04/2007): ചേറ്റുവ ചന്ദനക്കുടം നേര്‍ച്ചയ്ക്കിടെ ഇടഞ്ഞ ആനകളെ മെരുക്കാനുള്ള ശ്രമത്തില്‍ പാപ്പാന്‍ ചവിട്ടും കുത്തുമേറ്റു അരിച്ചു. ആനയുടെ കുത്തേറ്റും തിരക്കില്‍പ്പെട്ടും സ്തീകള്‍ക്കുള്‍പ്പെടെ 17 പേര്‍ക്ക് പരുക്കുണ്ട്.

നേര്‍ച്ചയോടനുബന്ധിച്ച് ഇന്നലെ വൈകീട്ട് അഞ്ചേകാലോടെ ചേറ്റുവ സ്കൂള്‍ ഗ്രൌണ്ടിലെ പ്രദര്‍ശന മത്സരത്തില്‍ എഴുന്നള്ളിച്ച ആനകളാണ് ഇടഞ്ഞത്. പൂങ്കുന്നത്തു നടുവത്തുമനയ്ക്കല്‍ വിനയന്‍ എന്ന ആനയുടെ പാപ്പാന്‍ കുറ്റിപ്പുറം തെക്കേ അങ്ങാടിയില്‍ മണകാട്ടില്‍ ഉണ്ണിയാണ്(47) മരിച്ചത്. ആനയുടെ കാലിനിടയില്‍പ്പെട്ട മറ്റൊരാളെ രക്ഷിക്കാനുള്ള ശ്രമത്തിലാണ് ഉണ്ണിക്കു കുത്തേറ്റത്. പാപ്പാന്മാരായ വട്ടേക്കാട് അടിത്തിരുത്തി ബാലന്‍, ഏത്തായ് കുന്നത്തു ശേഖരന്‍, നാട്ടുകാരായ കറുപ്പം വീട്ടില്‍ സുബൈര്‍, ഇബ്രാഹിം, നാലകത്ത് ഷവാഫ്, ഏത്തായ് സ്വദേശിനി ആമിന എന്നിവര്‍ക്കു ഗുരുതരമായ പരുക്കുണ്ട്.

വിനയന്‍, വിജയകൃഷ്ണന്‍, രഘുറാം എന്നീ ആനകളാണ് എഴുന്നെള്ളിപ്പിനുണ്ടായിരുന്നത്.

പാപ്പാന്റെ മര്‍ദനമേറ്റു വിജയകൃഷ്ണന്‍ ഇടഞ്ഞതോടെയാണു കുഴപ്പം തുടങ്ങിയതെന്നു ദൃക്‌സാക്ഷികള്‍ പറയുന്നു. വിജയകൃഷ്ണന്‍ വിരണ്ടതോടെ ആനകളുടെ പുറത്തുണ്ടായിരുന്നവര്‍ താഴേക്കു ചാടാന്‍ ശ്രമിച്ചു. ഇതോടെ കൂട്ടാനകളും വിരണ്ടു.

പുറത്തു നിന്നു ചാടിയവരെ കുത്താന്‍ തുനിഞ്ഞ വിനയന്റെ ശ്രദ്ധ തിരിക്കാന്‍ ശ്രമിച്ചപ്പോഴാണ് ഉണ്ണിക്കു കുത്തേറ്റത്. കൊമ്പില്‍ പിടിച്ചു വലിച്ച ഉണ്ണിയെ ആന തട്ടിയിട്ടു ചവിട്ടിക്കൊന്ന ശേഷം കൊമ്പുകള്‍‍ക്കിടയില്‍ കോര്‍ത്തു വലിച്ചെറിയുകയായിരുന്നു. രഘുറാം എന്ന ആനയെയും വിനയന്‍ കുത്തി വീഴ്ത്തി.

തുടര്‍ന്ന് മൂന്നാനകളും സ്കൂള്‍ അങ്കണത്തില്‍ തലങ്ങും വിലങ്ങും ഓടുകയായിരുന്നു. സ്ത്രീകളും കുട്ടികളുമുള്‍പ്പെടെ ഈ സമയം സ്കൂളിലുണ്ടായിരുന്ന നൂറുകണക്കിനാളുകള്‍ ക്ലാസ് മുറികളിലും ടെറസിലും കയറിയാണ് രക്ഷപ്പെട്ടത്.

ആനകള്‍ വരാന്ത വരെ കയറിയെങ്കിലും അകത്ത് കടക്കാന്‍ കഴിഞ്ഞില്ല. വിജയകൃഷ്ണന്‍ സ്കൂള്‍ ഗേറ്റ് കടന്നു ദേശീയ പാതയിലൂടെ വടക്കോട്ടോടിയപ്പോള്‍ വിനയന്‍ സ്കൂള്‍ വള‍പ്പില്‍ അതിക്രമം തുടര്‍ന്നു. മതിലും മരങ്ങളും ഷെഡുകളും തകര്‍ത്ത ആനയെ രാത്രി മയക്കുവെടി വെച്ചാണു തളച്ചത്. മറ്റാനകളെ പാപ്പാന്മാര്‍ തന്നെ തളച്ചു.

മരിച്ച ഉണ്ണി, തിരൂര്‍ തെക്കും‌മുറി മണക്കാട്ടില്‍ പരേതനായ വേലായുധന്റെ മകനാണ്. ഭാര്യ: നിര്‍മ്മല. മക്കള്‍: ഷമിത, ഷിമ, ഷമല്‍. മരുമക്കള്‍: പ്രസാദ്, ദിലീപ്.

* വാര്‍ത്തയ്ക്ക് കടപ്പാട്: മലയാള മനോരമ

ഗജറാണിമാർ!!!

2007-04-13T19:25:00.000+05:30

നമ്മുടെ നാട്ടിലെ ഗജറാണിമാർ!!!

ഗുരുവായൂരപ്പന്റെ സ്വന്തം ലക്ഷ്മികുട്ടി!!! (മലബാർ)

തിരുവിതാംകൂർ ഗജറാണി ദർശിനി!!!

ഇപ്പോൾ പട്ടാഭിഷേകം കഴിഞ്ഞ ചോറ്റാനിക്കര സീത - 09 -04-2007 (കൊച്ചി മഹാരാജ്യം)

ചിത്രങ്ങൾക്ക്‌ കടപ്പാട്‌:
http://www.guruvayurdevaswom.org/lakshmi.shtml
http://www.hindu.com/2006/07/01/stories/2006070111190400.htm
http://www.chottanikkarabhagavathy.org/elephant_seetha.html

ഗജഗുസ്തി!!!

2007-04-09T15:12:00.000+05:30

ഇടഞ്ഞ ആനയും കയ്യില്‍ കിട്ടിയ ബസ്സും

2007-02-28T17:14:00.000+05:30

ശ്രീലങ്കയില്‍ വച്ച് നടന്ന ആനകളുടെ പോളോ മത്സരത്തിനിടെ ഒരാന ഇടഞ്ഞപ്പോള്‍.

ആനപ്രസവവിശേഷങ്ങള്‍

2007-01-27T12:47:00.000+05:30


കുമളിക്കടുത്ത് ഈ അടുത്ത് ജനിച്ച് കുട്ടിയാനയുടെ പ്രസവ വിശേഷങ്ങള്‍. വീഡിയോ, കൈരളി ടി.വി യിലെ ഇ-ഫോര്‍-എലെഫന്റ് എന്ന പ്രോഗ്രാമില്‍ പ്രക്ഷേപണം ചെയ്തത്.

പുന്നത്തൂര്‍ കോട്ടയില്‍.

2006-11-28T01:04:00.000+05:30

പുന്നത്തൂര്‍ കോട്ടയില്‍ കല്യാണിക്കൊപ്പം വെയില്‍ കൊണ്ടു നടന്നപ്പോള്‍ കണ്ട കാഴ്ചകള്‍. ആനതന്നെ ഒരു അതിശയമായിരുന്ന അവള്‍ക്ക് ആനയുടെ ശീലങ്ങള്‍ അതിലും അതിശയമായി.

“ഒഴിയാനേ..” എന്നൊരു ഒറ്റവാക്കു മതി. അമ്മയുടെ വാക്ക് കേട്ട് പേടിച്ചരണ്ട ഉണ്ണി വെള്ളം കോരി തലയിലൊഴിക്കുന്ന അനുസരണയോടെ അവന്‍ ചെയ്യും. (ഒറ്റവാക്കില്‍ ഒരു ഭീമാകാരനെ പേടിപ്പിക്കുന്ന നന്നേ മെലിഞ്ഞ ആ കുഞ്ഞുപാപ്പാനെ കല്യാണി അതിശയത്തോടെ നോക്കുന്നുണ്ടായിരുന്നു)

ലഞ്ചു ബോക്സും ചുമന്ന് അടുത്ത കളരിയിലേക്ക്.

ഉച്ചവെയിലില്‍ ആ കൊച്ചുകുളത്തിന്റെ തണുപ്പില്‍ ഒരു മയക്കം. പിന്നിലെ കാലില്‍ പാപ്പാന്റെ കൈവേഗത്തിനൊപ്പം ഉരയുന്ന തൊണ്ടിന്റെ സുഖം.
ഇതാണ് ആനമയക്കം!

ഈ ചിത്രം എടുക്കുമ്പോള്‍ കല്യാണിക്ക് ചിരിയായിരുന്നു. “അഛാ.. ആനയുടെ മുന്നില്‍ ചെന്ന് എടുക്കഛാ..”
ആനപ്പുറത്തെ വെയില്‍ അവള്‍ക്ക് കാട്ടിക്കൊടുക്കാന്‍ തുടങ്ങും മുന്‍പുതന്നെ‍ അവള്‍ അടുത്ത ആനയുടെ പക്കമെത്തി.

നാട്ടുമരങ്ങള്‍ക്കിടയില്‍ ഒരു കരിവീട്ടി.

പോസ്റ്റില്‍ തന്നെ ഒരു ഓഫ് ടോപിക് : കല്യാണി ഒരു കുട്ടിയാന ‍അല്ല. എന്റെ മകളാണ്

കുട്ടിയാനച്ചന്തം

2006-10-12T11:27:00.000+05:30

ഗുരുവായൂര്‍ ആനപ്പന്തിയില്‍ വച്ച് പകര്‍ത്തിയ ഒരു കുട്ടിയാനയുടെ നൃത്തം.

ആനകള്‍ക്ക് രണ്ട് വര്‍ഷത്തോളമെടുക്കും തന്റെ തുമ്പിക്കൈയിലെ മസ്സിലുകള്‍ ഉറയ്ക്കാന്‍. അത് വരെ അവര്‍ തുമ്പിക്കൈ ഇങ്ങനെ തൂങ്ങിയാടുന്നത് ആസ്വദിക്കും. തുമ്പിക്കൈ വട്ടത്തിലാട്ടുകയും, മുകളിലേക്ക് എറിയുകയുമൊക്കെ ചെയ്യുന്നത് കുട്ടിയാനകള്‍ക്ക് ഒരു ഹരമാണ്.

ഇത് കണ്ടുകൊണ്ടിരിക്കാനുള്ള രസം പറഞ്ഞറിയിക്കുക വയ്യ.

കുട്ടിശങ്കരന്റെ വികൃതികള്‍

2006-10-01T11:48:00.000+05:30

നല്ല ഒരു അടിക്കുറിപ്പെഴുതി ഈ കുട്ടിശങ്കരനെ ആശീര്‍വ്വദിക്കൂ..

ഗജകേസരി മംഗലാകുന്ന്‌ ഗണപതി

2006-09-23T10:23:00.000+05:30

ആനകളും മനുഷ്യരും തമ്മിൽ ആയുസ്സ്‌ ഉൾപ്പടെയുള്ള പല കാര്യങ്ങളിലും സമാനതകളുണ്ട്‌. ഗജശാസ്ത്രമായ മാതംഗലീലയിൽ പറയുന്നത്‌, ആനകൾക്കിടയിലും ചാതുർവർണ്യം ഉണ്ടെന്നാണ്‌. മനുഷ്യർക്കിടയിൽ അത്‌ കർമ്മം (ഒരു തർക്കത്തിനുള്ള വിഷയം ?) കൊണ്ടാണെങ്കിൽ, ആനകൾക്കിടയിൽ അത്‌ സ്വഭാവം കൊണ്ടാണ്‌. അങ്ങിനെ ആനകളെ നാല്‌ വിഭാഗങ്ങളായി തരം തിരിക്കുകയാണെങ്കിൽ സാത്വിക ഗുണങ്ങളുള്ള വിഭാഗത്തിലാണ്‌ കളഭകേസരി മംഗലാകുന്ന്‌ ഗണപതിയുടെ സ്ഥാനം.

ഒരു നാടൻ ആനക്ക്‌ വേണ്ടതായ സൌന്ദര്യത്തിന്റെ ഭൂരിഭാഗം സവിശേഷതകളുമുള്ള ഒരു കരിവീരനാണ്‌ തെക്ക്‌ പോപ്സൺകാരുടെ അടുത്ത്‌ നിന്നും കാഞ്ഞിരക്കാട്ട്‌ മനയിലെത്തി, പിന്നെയവിടുന്ന് വടക്ക്‌ പാലക്കാട്ടെ മംഗലാകുന്ന്‌ എത്തിയ ഗണപതി. തിടമ്പ്‌ ശിരസ്സിലേറ്റിയാൽ അത്‌ താഴെയിറക്കുന്നത്‌ വരെയുള്ള ഗണപതിയുടെ 'നിലവ്‌' നേരിൽ കാണേണ്ട കാഴ്ച്ച തന്നെയാണ്‌. കുടുകുടെ നീരൊലിക്കുന്ന സമയത്തും തിടമ്പേറ്റി എഴുന്നള്ളിക്കാറുള്ള ഗണപതി, യാതൊരുവിധ പ്രശ്നങ്ങളും സൃഷ്ടിച്ചതായി, ഇതു വരെ അറിവില്ല. ഇതിന്റെ ഉത്തമോദാഹരണം, 8-9 വർഷം മുമ്പ്‌ തൃപ്പൂണിത്തുറ ശ്രീ പൂർണത്രയീശ ക്ഷേത്രത്തിൽ വൃശ്ചികോത്സവത്തിന്‌ എഴുന്നള്ളിക്കാനായി ഗണപതിയെ കൊണ്ടു വന്നപ്പോൾ അന്നത്തെ പാപ്പാനായിരുന്ന ശങ്കരനാരായണൻ തോട്ടി മംഗലാക്കുന്നിൽ വച്ച്‌ മറന്നു. രണ്ടു ദിവസം കഴിഞ്ഞാണ്‌ തോട്ടി തൃപ്പൂണിത്തുറയിലെത്തിയത്‌. പ്രശ്നങ്ങളൊന്നും കൂടാതെ ശങ്കരൻ ആനയെ എഴുന്നള്ളിക്കുകയും ചെയ്തു.

അതിനു ശേഷം 2-3 വർഷം കഴിഞ്ഞപ്പോഴേക്കും കണ്ണ്‌ തട്ടിയതു പോലെയായി ഗണപതിയുടെ അവസ്ഥ. എരണ്ടക്കെട്ട്‌ എന്ന അസുഖം പിടിപ്പെട്ട്‌ വളരെ ക്ഷീണിതനായ നിലയിലാണ്‌ ആനയെ കാണപ്പെട്ടത്‌. . ഒറ്റച്ചട്ടമായ ഗണപതിയുടെ പാപ്പാനെ മാറ്റുക എന്നത്‌ വിഷമകരമായ കാര്യമായിരുന്നു. പക്ഷെ അതും സംഭവിക്കുകയുണ്ടായി!!!

ആനകൾക്ക്‌ പലവിധ ബിരുദങ്ങളും നൽകുന്ന പതിവ്‌ നമ്മുടെ നാട്ടിൽ പണ്ട്‌ മുതലെ നിലനിൽക്കുന്നുണ്ട്‌. എന്നാൽ ഒരാനയും പപ്പാനും ആദരിക്കപ്പെടുക എന്നത്‌ വളരെ ദുർലഭമായ സംഗതിയാണ്‌. 1999-ൽ തൃപ്പൂണിത്തുറ താമരംകുളങ്ങര ശ്രീ ധർമ്മശാസ്താ ക്ഷേത്രത്തിൽ വച്ച്‌ ഗണപതിയേയും അന്നത്തെ പാപ്പാൻ ശങ്കരനേയും ക്ഷേത്ര സമിതിയും ആനപ്രേമികളും ചേർന്ന്‌ ആദരിച്ചത്‌ ഓർമയിൽ ഒരു കുളിർമ്മയായി ഇപ്പോഴും മനസ്സിൽ തങ്ങി നിൽക്കുന്നു...

സാധാരണ ഒരാനയെ ലോറിയിൽ കൊണ്ട്‌ പോകുമ്പോൾ, തലങ്ങും വിലങ്ങും മരത്തടികൾ കെട്ടി വച്ചിട്ടുണ്ടാവും... എന്നാൽ സർക്കസ്‌ ആനയെ പോലും വെല്ലുന്ന രീതിയിലാണ്‌ ഗണപതിയുടെ ലോറി യാത്ര!!! എന്റെ പരിമിതമായ അറിവിൽ, മംഗലാംകുന്ന്‌ ഗണപതിയാണ്‌ സ്ഥിരമായ ലോറി യാത്ര നടാടെ ആരംഭിച്ച ഗജവീരൻ!

ആനചന്തം എന്ന ചലച്ചിത്രത്തിൽ ഉന്മേഷവാനായി കാണപെട്ട മംഗലാംകുന്ന്‌ ഗണപതിക്ക്‌ വീണ്ടും ഒരങ്കത്തിന്‌ ബാല്യമുണ്ടന്നത്‌ ആനപ്രേമികളിൽ ഉത്സാഹം ജനിപ്പിക്കുന്നു.

ആനകളെ അറിയുക

2006-09-15T16:14:00.000+05:30

ആനകളെക്കുറിച്ച് ചില പൊതുവിജ്ഞാനങ്ങള്‍‍ ചുവടെ കൊടുക്കുന്നു.

Proboscidae എന്ന കുടുംബത്തില്‍ പെട്ടതാണ് ആനകള്‍. ഇന്ത്യയില്‍ ആനകള്‍ കാണപ്പെടുന്നത് South India, North-eastern India, ഹിമാലയന്‍ താഴ്വരകള്‍‍, ഒറീസ്സ എന്നിവിടങ്ങളിലാണ്.
ഏഷ്യന്‍ ആനകള്‍ അഞ്ച് തരമാണുള്ളത്. ഇന്ത്യന്‍, ബര്‍മ്മീസ്, സിലൊണീസ്, സുമാത്രന്‍, മലേഷ്യന്‍ എന്നിവയാണവ.
ഏഷ്യന്‍ പിടിയാനകള്‍ക്ക് 2.5 - 3.5 ടണ്ണും കൊമ്പനാനകള്‍ക്ക് 3.5 - 5 ടണ്ണും ഭാരമുണ്ടാകും.
കൊമ്പില്ലാത്ത ആണാനകളെ മോഴയാനകള്‍ എന്നാണ് വിളിക്കുന്നത്.
ആനകളുടെ തലയ്ക്ക് ഭാരം കൂടുതലായതിനാല്‍ അത് ഉയര്‍ത്തിപ്പിടിക്കാനായി ആനകളുടെ കഴുത്ത് വളരെ ചെറുതായിരിക്കും.
ദിനചര്യകളില്‍ സഹായത്തിനായി മറ്റ് ചില വസ്തുക്കള്‍ ഉപയോഗിക്കുന്ന വളരെ ചുരുക്കം മൃഗങ്ങളില്‍ ഒന്നാണ് ആന. കഴുകന്മാര്‍ ഒട്ടകപക്ഷിയുടെ മുട്ട തകര്‍ക്കാനായി കല്ലുകള്‍ ഉപയോഗിക്കുന്നതുപോലെ, കുരങ്ങന്മാര്‍ ഉറുമ്പുകളെ പുറ്റില്‍ നിന്ന് പുറത്തെടുക്കാന്‍ ഇലകള്‍ ഉപയോഗിക്കുന്നത്പോലെ, ആന പുറം ചൊറിയാന്‍ മരപ്പട്ട തുടങ്ങിയ വസ്തുക്കള്‍ ഉപയോഗിക്കാറുണ്ട്. ആനകള്‍ ഇതുപോലെ പലതും സ്വയം പഠിക്കുകയും നിത്യജീവിതത്തില്‍ ഉപയോഗിക്കാ‍ന്‍ എളുപ്പം ശീലിക്കുകയും ചെയ്യും.
വിരലില്ലാതെ നഖങ്ങളുള്ള ഒരേ ഒരു ജീവിയാണ് ആന . അധികം ആനകള്‍ക്കും 18 നഖമാണുണ്ടാകുക, 5 വീതം മുന്‍‌കാലുകളിലും 4 വീതം പിന്‍‌കാലുകളിലും. വളരെ വിരളമായി 20 നഖങ്ങളുള്ള ആനകളെ കാണാറുണ്ട്.(5 നഖങ്ങള്‍ എല്ലാ കാലുകളിലും). ആനയുടെ കാല്പാദം വളരെ കട്ടിയുള്ളതും കൊഴുപ്പ് നിറഞ്ഞതും ആണ്. ഇത് ആനയെ പാറ പോലുള്ള പ്രതലങ്ങളിലും മണല്‍ പോലെയുള്ള പ്രതലങ്ങളിലും നടക്കാന്‍ സഹായിക്കുന്നു.
ആനയുടെ മുന്‍‌കാലിന്റെ ചുറ്റളവ് കൊണ്ട് ആനയുടെ ഉയരം കണ്ടുപിടിക്കാം. ചുറ്റളവിന്റെ ഇരട്ടി ആയിരിക്കും ഉയരം എന്നാണ് കണക്ക്.
ആനയുടെ ചെവിയുടെ മുകള്‍ഭാഗം 10 വയസ്സാകുമ്പോഴേക്കും മടങ്ങിത്തുടങ്ങും. ഇരുപത് വര്‍ഷം ആകുമ്പോഴേക്കും ചെവി ഒരിഞ്ചോളം മടങ്ങിയിട്ടുണ്ടാകും. അത്കൊണ്ട്, ചെവിയില്‍ ഒരിഞ്ച് മടക്കുള്ള ഒരാനയ്ക്ക് ഉദ്ദേശം 30-35 വയസ്സ് കണക്കാക്കാം. ഇത് ഒരു ഏകദേശ കണക്ക് മാത്രം.
ഒരാനയുടെ തൂക്കം ഇങ്ങനെ കണക്കാക്കാവുന്നതാണ്.
W = 12.8 (g+ng) - 4281
W = ഭാരം കിലോഗ്രാമില്‍;
g = girth (നെഞ്ചളവ്, സെന്റിമീറ്ററില്‍);
ng = neck girth (കഴുത്തിന്റെ വ്യാസം സെന്റിമീറ്ററില്‍).
വെള്ളത്തില്‍ കളിക്കാന്‍ ആനകള്‍ക്ക് വളരെ ഇഷ്ടമാണ്. വളരെ നേരം നീന്താനും ആനകള്‍ക്ക് കഴിയും. ചളിയില്‍ കിടന്നുരുളാനും ആനകള്‍ക്ക് വളരെ താല്പര്യമാണ്.
ആനകള്‍ കാട്ടില്‍ ഭക്ഷണത്തിനും, തണലിനും, വെള്ളത്തിനുമായി ഒരുപാട് ദൂരം ദിവസവും നടക്കാറുണ്ട്. ഒരുപാട് ഭക്ഷണം വേണമെന്നതിനാല്‍ ഈ നടത്തം ദിവസവും ആവശ്യമായി വരുന്നു. പക്ഷെ ഒരേ സ്ഥലത്ത് തന്നെ അവിടത്തെ ഭക്ഷണം തീരുന്നതു വരെ നില്‍ക്കുന്ന സ്വഭാവം ആനകള്‍ക്കില്ല.
ആനകള്‍ വളരെ പതുക്കയേ നടക്കാറുള്ളൂ. വേഗത ഉദ്ദേശം 4km/hr. പക്ഷെ ആനയ്ക്ക്, മനുഷ്യരില്‍ ഏറ്റവും വേഗം കൂടിയ നൂറുമീറ്റര്‍ ഓട്ടക്കാരനേക്കാല്‍ വേഗത്തില്‍ ഓടാന്‍ കഴിയും.
മൂന്ന് തരം സസ്യജാലങ്ങള്‍ ആന ഭക്ഷിക്കും i.e., lower (grass), middle (bush), and upper (canopy) tiers.
ആനകള്‍ ശുചിത്വത്തിന് വളരെ പ്രാധാന്യം കല്‍പ്പിക്കുന്നു. മേയുമ്പോള്‍ ഇലകല്‍ സ്വന്തം കാലില്‍ അടിച്ച് പൊടിയും ചെളിയും കളഞ്ഞതിനുശേഷമേ ആന ഭക്ഷിക്കുകയുള്ളൂ.
200-255 ലിറ്റര്‍ വെള്ളം ആന ദിവസവും കുടിക്കും. അത്, 50-60 ലിറ്റര്‍ ഒറ്റയടിക്ക്, 3-4 തവണയായി ആണ് കുടിക്കുക. തുമ്പികൈയില്‍ 6-7 ലിറ്റര്‍ ആണ് സാധാരണ ആന എടുക്കുക. 10 ലിറ്റര്‍ വരെ എടുക്കാന്‍ ആനയ്ക്ക് സാധിക്കും.
ചെറുദൂരം ഏതാണ്ട് 25 Km/hr വേഗതയില്‍ ആനയ്ക്ക് ഓടാന്‍ സാധിക്കും. 30-40 kms/hr വരെ വേഗതയില്‍ ആന ഓടാറുള്ളതായി തമിഴ്‌നാട്ടിലുള്ള മധുമലൈ ആന ക്യാമ്പ് സാക്ഷ്യപ്പെടുത്തുന്നു. കാലില്‍ ചങ്ങല ഉണ്ടെങ്കിലും ആനകള്‍ക്ക് വേഗത്തില്‍ നീങ്ങാന്‍(hop) സാധിക്കും. പക്ഷെ കുതിരയെപ്പോലെ ചാടാനോ (gallop) കന്നുകാലികളെപ്പൊലെ ഓടാനോ ആനയ്ക്ക് സാധിക്കില്ല.
മനുഷ്യര്‍ക്ക് കേള്‍ക്കാന്‍ പറ്റാത്ത ഫ്രീക്വന്‍സികളിലുള്ള ശബ്ദവും ആനകള്‍ക്ക് കേള്‍ക്കാനാകും. മനുഷ്യര്‍ക്ക് കേള്‍ക്കാ‍ന്‍ പറ്റുന്ന ഫ്രീക്വന്‍സിക്ക് താഴെയുള്ള ശബ്ദം ഇന്‍ഫ്രാസോണിക്ക് എന്നും അതിനു മുകളിലുള്ള ശബ്ദം അള്‍ട്രാസോണിക്ക് എന്നും വിളിക്കപ്പെടുന്നു. ആനകള്‍ അള്‍ട്രാസോണിക്ക് ശബ്ദം വഴിയാണ് തമ്മില്‍ സംസാരിക്കാറ്. മസ്തകത്തിനും തുമ്പികൈക്കും ഇടയിലുള്ള ഭാഗം കൊണ്ടാണ് ആന ഈ ശബ്ദം ഉണ്ടാക്കുന്നത്. ഇതാണ് ആനയുടെ തല വെള്ളത്തില്‍ മുങ്ങിക്കിടക്കുന്ന സമയത്ത് വെള്ളത്തില്‍ അലകളായി കാണുന്നത്. ആനകള്‍ക്ക് വലിയ ചെവികളായതിനാല്‍ വളരെയധികം ഫ്രീക്വസികളിലുള്ള ശബ്ദം ശ്രവിക്കാനാകും. ആനയുടെ കാല്‍പ്പാദങ്ങളിലൂടെയും ആനയ്ക്ക് കേള്‍‍ക്കാനാകുമെന്ന് പരീക്ഷണങ്ങള്‍ തെളിയിച്ചിട്ടുണ്ട്. ഭൂമികുലുക്കവും മറ്റും ആനകള്‍ നേരത്തേ മനസ്സിലാക്കുന്നത് അങ്ങിനെയാണ് ഇപ്പോള്‍ ശാസ്ത്രീയമായി തെളിയിക്കപ്പെട്ടിട്ടുണ്ട്.
ആനയുടെ കാഴ്ചശക്തി വളരെ മോശമായതിനാല്‍ ആന മണമാണ് തിരിച്ചറിയാനായി‍ ഉപയോഗിക്കുന്നത്. വര്‍ഷങ്ങള്‍ക്ക് ശേഷം കാണുന്നവരെപ്പോലും ആന ഓര്‍മ്മയിലുള്ള മണം കൊണ്ട് തിരിച്ചറിയാറുണ്ട്.
കേരളത്തില്‍, ആനകള്‍ പഞ്ചവാദ്യത്തിനനുസരിച്ച് ചെവിയാട്ടുന്നതാണെന്നൊരു വിശ്വാസം നിലവിലുണ്ട്. പക്ഷെ ഇത് സത്യമല്ല. തങ്ങളുടെ ശരീരം തണുപ്പിക്കുന്നതിനുവേണ്ടിയാണ് ആന ചെവിയാട്ടുന്നത്. ശരീരത്തില്‍ വിയര്‍പ്പ്ഗ്രന്ഥികളില്ലാത്തതിനാല്‍ ചെവിയെ ആണ് ആനകള്‍ ശരീരോഷ്മാവ് നിയന്ത്രിക്കാന്‍ ആശ്രയിക്കുന്നത്. ശരീരത്തിലെ എല്ലാ ഭാഗങ്ങളില്‍ നിന്നും രക്തം ചെവിയിലേക്കെത്തിച്ച് അവിടെ വച്ച് ചെവിയാട്ടുക വഴി തണുപ്പിക്കുകയാണ് ആന ചെയ്യുന്നത്. ഈ തണുപ്പിച്ച രക്തം തിരിച്ചൊഴുകി ശരീര താപനില കുറയ്ക്കുന്നു . ആനയുടെ ചെവിയിലേക്കൊഴുന്ന രക്തത്തിനും പുറത്തേക്കൊഴുകുന്ന രക്തത്തിനും ഒരു സെന്റിഗ്രേഡ് താപനിലയുടെ വെത്യാസം ഉള്ളതായി കണ്ടുപിടിക്കപ്പെട്ടിട്ടുണ്ട്.
ആനയുടെ ശരീര താപനില 96.6 OF ( 36.9 OC) ആണ്.
ആനയുടെ തലയോട്ടിയില്‍ ഒരുപാട് സൈനസ്സുകള്‍ ഉള്ളതിനാല്‍ ആനയുടെ തല, കാണുമ്പോള്‍ തോന്നുന്നത്ര ഭാരമുള്ളതല്ല.
ആനയുടെ പല്ലുകള്‍ ആയുസ്സില്‍ അഞ്ച് തവണ മാറ്റപ്പെടും. മിക്ക സസ്തനികള്‍ക്കും പല്ലുകള്‍ താഴെ നിന്ന് മുകളിലേക്കാണ് വളരുക. ആനകള്‍ക്ക് പിന്നില്‍ നിന്ന് മുന്‍പോട്ടാണ് വളര്‍ച്ച.
ആനക്കൊമ്പ് ആനയുടെ പല്ല് വളര്‍ന്ന് വരുന്നതാണ്. കൊമ്പനാനകള്‍ക്ക് കൊമ്പ് വളര്‍ച്ച് രണ്ട് രണ്ടര വയസ്സുള്ളപ്പോള്‍ തന്നെ തുടങ്ങും. മൂന്ന്-നാല് ഇഞ്ച് കൊല്ലത്തില്‍ കൊമ്പിന് വളര്‍ച്ച ഉണ്ടാകും. മുറിച്ചുകളഞ്ഞാലും വീണ്ടും വളരാനുള്ള കഴിവുണ്ട് ഈ കൊമ്പിന്. കൊമ്പിന്റെ അകത്ത് പള്‍പ്പ് എന്നൊരു ഭാഗം ഉണ്ടാകും പല്ലില്‍ ഉള്ള പോലെ. മനുഷ്യരില്‍‍ ഇടതുകൈയ്യന്മാരും വലത്കൈയ്യന്മാരും ഉള്ളത് പോലെ ആനകള്‍‍ക്കും ഒരു കൊമ്പില്‍ സ്വാധീനം കൂടുതല്‍ ഉണ്ടാകും.
ആനയ്ക്ക് നാക്ക് അധികം ചലിപ്പിക്കാന്‍ സാധിക്കില്ല. നാക്ക് പുറത്തേക്കെടുക്കാനും സാധ്യമല്ല. നാക്കില്‍ വച്ച ഭക്ഷണം അകത്തേക്ക് തള്ളാനാണ് ആന നാക്കിനെ ഉപയോഗിക്കുന്നത്.
മുകള്‍ച്ചുണ്ടും മൂക്കും തമ്മില്‍ കൂടിച്ചേരുന്ന ഭാഗം വളര്‍ന്നുണ്ടാവുന്നതാണ് തുമ്പികൈ. തുമ്പികൈയില്‍ ഉദ്ദേശം ഒരുലക്ഷം muscles ഉണ്ടാ‍കും.
കണ്ണുനീര്‍ മൂക്കിലേക്ക് ഒഴുകാന്‍ മനുഷ്യരെപ്പോലെ ശരീരത്തിനകത്ത് ചാലുകള്‍ ഇല്ലാത്തതിനാല്‍ ആനയുടെ കണ്ണുനീര്‍ എപ്പോഴും പുറത്തേക്ക് ഒഴുകിക്കൊണ്ടിരിക്കും.
കുറച്ച് വിയര്‍പ്പ്ഗ്രന്ഥികള്‍ ആനയുടെ നഖത്തിനടിയിലും‍ ഉണ്ടാകാറുണ്ട്. എന്നാല്‍ അത് മതിയാകാത്തതിനാല്‍ ആന ശരീരം തണുപ്പിക്കാന്‍ സ്വന്തം ഉമിനീര്‍ ദേഹത്ത് തളിക്കാറുണ്ട്.
ആനയുടെ ത്വക്ക് വളരെ കട്ടിയുള്ളതാണ്. എങ്കിലും മറ്റ് ജീവികളെപ്പോലെ മുറിവേറ്റാല്‍ ആനയ്ക്ക് വേദനിക്കും. ഈ ത്വക്കില്‍ പല മടക്കുകളും ഉണ്ടാകും. ഈ മടക്കുകള്‍ ശരീരോഷ്മാവ് നിയന്ത്രിക്കാന്‍ സഹായിക്കുന്നു.
ആനയ്ക്ക് മദഗ്രന്ഥി എന്നൊരു ഗ്രന്ഥി ഉണ്ട്. അത് വര്‍ഷത്തില്‍ ഒരു കാലയളവില്‍ പൊട്ടിയൊലിക്കും. ഇത് ആനയ്ക്ക് വളരെയധികം വേദനയുണ്ടാക്കുമെന്നതിനാല്‍ ആ സമയത്ത് ആന വളരെ ആക്രമണകാരിയായിരിക്കും. പപ്പാന്മാര്‍ പറയുന്നതൊന്നും അനുസരിക്കാന്‍ ആ സമയത്ത് ആന കൂട്ടാക്കാറില്ല. ശരീരം വളരെയധികം ചൂടാകുമെന്നതിനാല്‍ ആ സമയത്ത് മുഴുനേരവും വെള്ളം ഒഴിച്ച് ശരീരം തണുപ്പിക്കാന്‍ ആന ശ്രമിക്കും. ചില പിടിയാനകള്‍ക്കും വളരെ അപൂര്‍വ്വമായി മദം പൊട്ടാറുണ്ട്. പക്ഷെ ആ സമയത്ത് കൊമ്പനാനയെപ്പോലെ പിടിയാന അക്രമണകാരിയാവാറില്ല.
ആനയുടെ കാലുകളുടെ ആകൃതി കാരണം ആനയ്ക്ക് ചാടാന്‍ കഴിയില്ല. ചാടിവീഴുമ്പോഴുള്ള ക്ഷതം താങ്ങാന്‍ ആനയുടെ കാലുകള്‍ക്ക് കെല്‍പ്പില്ല. എന്നാല്‍ ആനയുടെ മുട്ട് വളരെ താഴെയായതിനാല്‍ ആനയ്ക്ക് കുനിയാനും നിവരാനും എളുപ്പമാണ്.
മറ്റ് സസ്തനികളെപ്പോലെ ആനയുടെ ഹൃദയത്തിന്റെ ഒരറ്റം കൂര്‍ത്തതല്ല.
കടലിലെ സസ്തനികളെപ്പോലെ ആനയുടെ വൃഷണം ശരീ‍രത്തിനകത്താണ് (കിഡ്നിയുടെ അടുത്ത്). മദമിളകുന്ന സമയത്ത് ആനയുടെ വൃക്ഷണം വലുതാകും.
ആനയുടെ ഗര്‍ഭകാലം 21 മാസമാണ്. ഗര്‍ഭം ധരിച്ചിരിക്കുന്ന സമയത്തും ആനകള്‍ക്ക് അണ്ഡധാരണം ഉണ്ടാകും.
ജനിച്ചയുടനെ ആനക്കുട്ടിക്ക് 80-100 kg ഭാരവും 90-100 cms പൊക്കവും ഉണ്ടാകും.
മുന്‍‌കാലുകള്‍ക്കിടയിലാണ് ആനയ്ക്ക് സ്തനങ്ങള്‍ ഉണ്ടാകുക. പാല്‍ ചുരത്തുന്ന പല സുഷിരങ്ങള്‍ ഉണ്ടാകും സ്തനത്തില്‍. 4-5 വര്‍ഷത്തോളം ആനകള്‍ കുഞ്ഞുങ്ങള്‍ക്ക് മുലയൂട്ടാറുണ്ട്, പക്ഷെ നാട്ടാനകള്‍‍ രണ്ട് വര്‍ഷത്തോടെ മുലയൂട്ടല്‍ നിര്‍ത്തും.
സസ്യഭുക്കുകള്‍ ആണെങ്കിലും ആഫ്രിക്കന്‍ ആനകളുടെ കൊളസ്റ്റ്രോള്‍ ലെവല്‍, ബീഫ് കഴിക്കുന്ന മനുഷ്യന്മാരേക്കാള്‍ കൂടുതലാണ്.
ആനകള്‍ക്ക് ഗാള്‍ ബ്ലാഡ്ഡര്‍ ഉണ്ടാവില്ല.
നായ്ക്കള്‍ ഇരിക്കുന്നപോലെ ഒരു വശത്തേക്ക് ചെരിഞ്ഞ് കിടക്കുന്നത് (Dog posture or 'sternal recumbency' posture) മറ്റ് മൃഗങ്ങല്‍ക്ക് വളരെ സൌകര്യമാണെങ്കിലും ആനകള്‍ക്ക് അത് അപകടകരമാണ്, പ്രത്യേകിച്ച് ആന തളര്‍ന്നിരിക്കുമ്പോള്‍. ആനയുടെ കരളിനു ചുറ്റും pleural cavity ഇല്ലാത്തതിനാല്‍, ആനയെ മയക്കുമരുന്ന് കൊടുത്തതിനുശേഷമോ അല്ലാതെയോ ചെരിച്ച് അധികനേരം കിടത്തുന്നത് അപകടമാണ്.
ശ്വസനത്തിന്റെ റേറ്റ് ആന നില്‍ക്കുമ്പോള്‍ മിനുട്ടില്‍ പത്ത് തവണയാണ്; കിടക്കുമ്പോള്‍‍ അത് അഞ്ചായി ചുരുങ്ങും.
മനുഷ്യരെപ്പോലെയുള്ള കാല്‍മുട്ടുകളായതിനാല്‍ ആനകള്‍ക്കും ആര്‍ത്രൈറ്റിസ് വരാറുണ്ട്.
ആനയ്ക്ക് 282 എല്ലുകള്‍ ഉണ്ടാകും. 61 vertebrae യും. എല്ലുകള്‍ക്ക് വണ്ണം കുറവായതിനാല്‍ ഒടിയാനുള്ള സാധ്യത കൂടുതലാണ്.
ആനയ്ക്ക് ഒരുപാടുനേരം നില്‍ക്കാന്‍ കഴിയും. കുതിരകള്‍ക്ക് നിന്നുറങ്ങാന്‍ പാകത്തില്‍ ലിഗമെന്റ്സ് ഉള്ളത് പോലെ ആനകള്‍ക്കും ഉണ്ട്. അതിനാല്‍ ആനകള്‍ക്കും കാല്‍കഴപ്പില്ലാതെ ഒരുപാടുകാലം നില്‍ക്കാന്‍ കഴിയും. തൃപ്പൂണിത്തുറയില്‍ ഒരാന പതിനെട്ട് മാസത്തോളം, സുഖമില്ലാതിരുന്ന ഒരു അവസ്ഥയില്‍ ഒറ്റ നില്‍പ്പ് നിന്നിട്ടുണ്ട്. വളര്‍ത്തുന്ന ആനകള്‍ പകല്‍ സമയത്ത് കിടക്കാറില്ല.
മിക്ക മൃഗങ്ങളും അവരുടെ കാലുമുട്ടുകള്‍‍ പിറകോട്ടാണ് മടക്കാറ് ഉറങ്ങുമ്പോള്‍. ആനയാകട്ടെ മുന്‍പോട്ടും.
ആനകള്‍ ദിവസത്തില്‍ 10-15 തവണ മൂത്രമൊഴിക്കും. 50-60 ലിറ്ററോളം വെള്ളം അതു വഴി ആനയ്ക്ക് നഷ്ടപ്പെടും.
വെള്ളമില്ലാത്ത അവസ്ഥയില്‍ മണ്ണിനടിയില്‍ വെള്ളമുള്ള സ്ഥലം മനസ്സിലാക്കി മണ്ണ് മാന്തി എടുക്കാന്‍ ആനകള്‍ക്ക് കഴിവുണ്ട്.
ആനകള്‍ക്ക് വളരെയധികം ഓര്‍മ്മശക്തി ഉണ്ടാകും. മദം പൊട്ടുന്ന സമയത്ത് ആനകള്‍ തങ്ങളുടെ പപ്പാന്മാരെ തിരഞ്ഞ് പിടിച്ച് അക്രമിക്കും.
കാട്ടില്‍ വച്ച് ഒരാന പിറക്കുമ്പോള്‍ അതിനെ പരിശീലിപ്പിക്കാനും അനുസരണ പഠിപ്പിക്കാനും എല്ലാ വലിയ ആനകളും കൂടും. എന്നാല്‍ നാട്ടാനകള്‍ക്ക് കുട്ടിയുണ്ടാകുമ്പോള്‍ മനുഷ്യര്‍ അധികമായി സ്നേഹം കാണിക്കുന്നത് കൊണ്ട് ആനക്കുട്ടി അനുസരണക്കേട് കൂടുതലായി കാണിക്കും. മുലയൂട്ടല്‍ കഴിഞ്ഞ് നല്ല പരിശീലകരാല്‍ നല്ലവണ്ണം പരിശീലിപ്പിച്ചില്ലെങ്കില്‍ പിന്നെ ഈ ആന ഇണങ്ങില്ല.
ആനകളുടെ കൂട്ടം മിക്കവാറും നയിക്കുന്നത് തലമുതിര്‍ന്ന ഒരു പിടിയാനയായിരിക്കും. കൊമ്പനാനകള്‍ കൂട്ടം കുടി സഞ്ചരിക്കാന്‍ വിമുഖത കാണിക്കാറുണ്ട്. വേനല്‍ക്കാലത്ത് വെള്ളത്തിനും ഭക്ഷണത്തിനും ദൌര്‍ലഭ്യം ഉണ്ടാകൂമ്പോള്‍ ചെറിയ കൂട്ടങ്ങളായി ഈ കൂട്ടം പിരിഞ്ഞു പലവഴിക്ക് പോകും. കാലാവസ്ഥ മെച്ചപ്പെടുന്നതോടുകൂടി ഇവര്‍ വീണ്ടും ഒന്നിച്ച് ചേരും. കാട്ടാനകള്‍ 60-70% സമയവും ഭക്ഷണം കഴിച്ചുകൊണ്ടെയിരിക്കും. വേനല്‍‌ക്കാലത്ത്, ദിവസവും ഇവര്‍ 2-4 മണിക്കൂര്‍ വിശ്രമിക്കും ചൂടുകാരണം heat strokes ഉണ്ടാവാതിരിക്കാന്‍.
ആഫ്രിക്കയില്‍ ഒരിക്കല്‍ ഒരു ദേശീയോദ്യാനത്തില്‍ കാട്ടാനകള്‍ യാതൊരു പ്രകോപനവുമില്ലാതെ കണ്ടാമൃഗങ്ങളെ ആക്രമിച്ച് കൊല്ലുന്നതായി ശ്രദ്ധയില്‍പ്പെട്ടു. കണ്ടാമൃഗങ്ങളുടെ എണ്ണം വളരെയധികം കുറഞ്ഞ വന്നു. മൃഗശാലാധികൃതര്‍ അന്വേഷണം നടത്തിയപ്പോള്‍ മനസ്സിലായത് ഈ കാട്ടാനക്കൂട്ടത്തില്‍‍ വലിയ പിടിയാനകള്‍ ഇല്ലാത്തതിനാല്‍ ചെറിയ ആനകള്‍ക്ക് അക്രമണപ്രവണത കൂടുതലായി ഉണ്ടായി എന്നുള്ളതാണ്. പുറമേ നിന്ന് കുറച്ച് മുതിര്‍ന്ന പിടിയാനകളെ കൊണ്ട് വന്ന് അവര്‍ പ്രശ്നത്തിന് പരിഹാരമുണ്ടാക്കി. പ്രതീക്ഷിച്ചതുപോലെ കുട്ടിയാനകള്‍ മര്യാദരാമന്മാരായി.
കാട്ടാനക്കൂട്ടങ്ങളെ വിരട്ടിയാല്‍ അവരുടെ പ്രതിരോധം ഇപ്രകാരമാണ് സ്വീകരിക്കുക. അവര്‍ ആദ്യം ഒരൊറ്റവരിയില്‍ വന്ന് നില്‍ക്കും. പിന്നീട് അതൊരു വൃത്തമാക്കും. കുട്ടികള്‍ അകത്തും മുതിര്‍ന്നവര്‍ പുറത്തും.
ആനകളെ പൂര്‍ണ്ണമായും മെരുക്കിയെടുക്കാന്‍ കഴിയില്ല. എത്ര മെരുങ്ങിയാലും അവര്‍ക്കെപ്പോഴും കാട്ടിലേക്ക് മടങ്ങണമെന്ന് ആഗ്രഹമുണ്ടാകും. മറിച്ച് പട്ടി, പൂച്ച തുടങ്ങിയ ജീവികള്‍‍‍ ഇണങ്ങിക്കഴിഞ്ഞാല്‍ ഒരിക്കലും തിരിച്ചുപോകില്ല.
അര്‍ത്ഥശാസ്ത്രത്തില്‍ ചാണക്യന്‍ ആനകളുടെ വില സ്വര്‍ണ്ണത്തിനു തുല്യമായാണ് വര്‍ണ്ണിക്കുന്നത്. ആനകളെക്കൊല്ലുന്നത് പരമാവധി ശിക്ഷയ്ക്ക് അര്‍ഹമാണെന്നാണ് ചാണക്യന്റെ അഭിപ്രായം.

ഗജചക്രവർത്തി!!!

2006-09-14T18:06:00.000+05:30

മാതംഗമെന്ന പദം കേട്ടാൽ അഭിമാനപൂരിതമാകണമന്തരംഗം...
ഗിരീശനെന്ന് കേട്ടാലോ തിളക്കണം ചോര നമുക്ക്‌ ഞരമ്പുകളിൽ!!!!

ഇദ്ദേഹതിന്റെ നാമം കൊടുങ്ങല്ലൂർ ഗിരീശൻ എന്നാണെങ്കിലും, ഞങ്ങൾ തൃപ്പൂണിത്തുറക്കാർക്ക്‌, ഞങ്ങളുടെ സ്വന്തം ഗിരീശനാണ്‌.

തനി കേരളീയൻ. ഉയർന്ന മസ്തകം, വീണെടുത്ത കൊമ്പുകൾ, നല്ല മദഗിരി, എപ്പ്പ്പോഴും തല ഉയർത്തി നിൽക്കുന്ന തികഞ്ഞ അഭിമാനി....

ശ്രീ പൂർണത്രയീശന്റെ ഭക്തോത്തമൻ....

അറിയാതെ ചെയ്ത കുറ്റത്തിന്‌ പ്രായശ്ചിത്തമായി കണ്ണീർ ഉതിർത്ത ഗജരാജൻ.

ഇദ്ദേഹം ഗജരാജനല്ല!!!... ഗജചക്രവർത്തി ആണ്‌!!!!

ഗജലക്ഷണങ്ങൾ ഒത്തിണങ്ങിയ ചക്രവർത്തി!!!

ഏഷ്യന്‍ ആനകളും ആഫ്രിക്കന്‍ ആനകളും

2006-09-14T11:30:00.000+05:30

ഏഷ്യന്‍ ആനകളും ആഫ്രിക്കന്‍ ആനകളും: ഒരു താ‍രതമ്യപഠനം
ഏഷ്യന്‍ ആനകള്‍	ആഫ്രിക്കന്‍ ആനകള്‍

വലിപ്പം കുറവായിരിക്കും.	നല്ല വലിപ്പം ഉണ്ടായിരിക്കും.
പൊക്കം കുറവായിരിക്കും.	നല്ല പൊക്കം ഉണ്ടായിരിക്കും.
നടുവിന്റെ മധ്യഭാഗത്തിനായിരിക്കും ശരീരത്തില്‍ കൂടുതല്‍ ഉയരം.	ചുമലാണ് ശരീരത്തിലെ ഏറ്റവും ഉയര്‍ന്ന ഭാഗം.
ചെവി ചെറുതായിരിക്കും.	വളരെ വലിപ്പം ഉള്ള, മുകളില്‍ തമ്മില്‍ത്തട്ടുന്ന തരത്തിലുള്ള ചെവികളായിരിക്കും.
തുമ്പിക്കൈ വലുതും നീളം ഉള്ളതുമായിരിക്കും.	ശരീരത്തെ അപേക്ഷിച്ച് തുമ്പിക്കൈ ചെറുതായിരിക്കും.
തുമ്പിക്കൈയുടെ അറ്റത്ത് ഒരു വിരല്‍ പോലെ നീണ്ട അറ്റം ഉണ്ടായിരിക്കും.	തുമ്പിക്കൈയുടെ അറ്റത്ത് വിരല്‍ പോലെ നീണ്ട അറ്റങ്ങള്‍ രണ്ടെണ്ണം ഉണ്ടാകും.
ചെറിയ കൊമ്പായിരിക്കും.	വളരെ നീളം കൂടിയതും വളഞ്ഞതുമായ കൊമ്പായിരിക്കും.
കൊമ്പ് ആണാനയ്ക്ക് മാത്രം.	കൊമ്പ് ആണിനും പെണ്ണിനും ഉണ്ടാകും.
എല്ലാ കാലിലും കൂടി പതിനെട്ട് നഖങ്ങള്‍ ആണ് സാധാരണയായി ഉണ്ടാകുക.	എല്ലാ കാലിലും കൂടി പതിനാല്‍ നഖങ്ങള്‍ ആണ് സാധാരണയായി ഉണ്ടാകുക.
പുറത്തേക്ക് വളഞ്ഞ തരത്തില്‍ തടസ്സങ്ങളില്ലാത്ത പുറം ആയിരിക്കും.	നടുക്ക് കുഴിഞ്ഞ തരത്തിലായിരിക്കും പുറം.
രണ്ട് തടിപ്പുകളുള്ള നെറ്റി ആയിരിക്കും.	നീണ്ട് മെലിഞ്ഞ പരന്ന നെറ്റി ആയിരിക്കും.
ആണാനയ്ക്ക് മാത്രമേ മദപ്പാട് വരികയുള്ളൂ	ആണാനയ്ക്കും പെണ്ണാനയ്ക്കും മദപ്പാട് ഉണ്ടാകും.
മെരുക്കാന്‍ എളുപ്പം	എളുപ്പം മെരുങ്ങാത്ത പ്രകൃതം.

ഗജരത്നം - ഗുരുവായൂര്‍ പത്മനാഭന്‍.

2006-09-13T12:25:00.000+05:30

ഇതിന്റെ ആദ്യ പോസ്റ്റില്‍ ഏത് ഗജരാജന്‍ വേണം എന്നൊരു കണ്‍ഫ്യൂഷന്‍ മനസിലുണ്ടായിരുന്നു.
പാമ്പാടി രാജന്‍ ആയിരുന്നു ആദ്യം മനസില്‍. തലയെടുപ്പില്‍ അവന്‍ മുന്നിലാണല്ലോ.
അപ്പോള്‍ പിന്നെ പൂക്കോടന്‍ ശിവനോ? അവനാവുമ്പോള്‍ ഇത്തിരി ഐശ്വര്യം കൂടി കൂടുതലില്ലേ?
പൊതുവേ ശാന്തനായ ഷേണായി ചന്ദ്രശേഖരന്‍?
ഒരുപാട് പേരുടെ ഇഷ്ടതാരമായ കുട്ടന്‍‌കുളങ്ങര രാമദാസ്?
വേണ്ട ലിസ്റ്റ് നീളും എല്ലാവരേയും ആദ്യം പോസ്റ്റേണ്ടിവരും. അതുകൊണ്ട് ഗജരത്നം ഗുരുവായൂര്‍ പത്മനാഭന്‍ തന്നെ ചുവട് വയ്ക്കട്ടെ ആദ്യം. പതിനേഴില്‍ പതിനാറു ലക്ഷണവും ഒത്ത ഗുരുവായൂര്‍ പത്മനാഭന്‍. (ഇതു ഗുരുവായൂര്‍ ദേവസ്വത്തിന്റെ ആനകള്‍‍ക്ക് കൊടുക്കുന്ന പട്ടം ആണ്.) എന്റെ കണ്ണുകളില്‍ തിരുവമ്പാടി ശിവസുന്ദര്‍ എന്ന പൂക്കോടന്‍ ശിവന്‍ തന്നെയാണ് ഇതിനേക്കാളും കേമന്‍ (അവന്‍ പിന്നാലെ ചുവടുവയ്ക്കും)

(ചിത്രങ്ങള്‍ കൈമറിഞ്ഞ് കിട്ടിയതാണ്, എന്റേത് അല്ല.)

ഇത് കരിവീരന്മാര്‍ക്ക് വേണ്ടിയുള്ള ലോകമാണ്.
അവന്റെ ചന്തത്തില്‍ മനസുകുരുക്കിയിട്ടിരിക്കുന്നവര്‍ക്കൊക്കെ സ്വാഗതം. ഈ മൈല്‍ അഡ്രസ്സ് ഇവിടെ പറയു,‍ ഇതില്‍ ഒപ്പം കൂട്ടാം. ഒരാള്‍ പോസ്റ്റ് ചെയ്ത ആനയുടെ ചിത്രം തന്നെ മറ്റൊരാള്‍ക്ക് വീണ്ടും പോസ്റ്റാം. പക്ഷെ ഒരു വ്യത്യസ്ത ചിത്രം എന്നു ഉറപ്പുവരുത്തുക.
വരുന്ന ചിത്രത്തിലെ ആനയുടെ വിവരങ്ങള്‍ കാഴ്ചക്കാര്‍ക്ക് അറിയാമെങ്കില്‍ പങ്കുവയ്ക്കാം കമന്റിലൂടെ. അല്ലെങ്കില്‍ ഒരു പോസ്റ്റിലൂടെ.

അപ്പോള്‍ തുടങ്ങാം അല്ലേ എഴുന്നള്ളത്ത്?